Gal 5 | ASO | STEP | Ido' Kilisito' aza nene goboni ve gohi ma minamilisave lo laza Mose' lou' gamazi'mi gesi mingu' mino a'mine'mi goboni ve mino geni gono do minunidoti' nene do heta o-ledave. Nemu' nene gohi lou' gamazi ne'mi gesi mingu' lengele'mizi mili goboni ve lili' i-lingidikelizaze. Gamazi'ine nene gili huli hetavo' moni minilo.

Galatians 5

1 Ido' Kilisito' aza nene goboni ve gohi ma minamilisave lo laza Mose' lou' gamazi'mi gesi mingu' mino a'mine'mi goboni ve mino geni gono do minunidoti' nene do heta o-ledave. Nemu' nene gohi lou' gamazi ne'mi gesi mingu' lengele'mizi mili goboni ve lili' i-lingidikelizaze. Gamazi'ine nene gili huli hetavo' moni minilo.

Mose' Lou' Gamazi'mi Gesi Mingu' Vo Holalone' Nene Kilisitoda Vo Gi'mizune' Nene Vo Haza Ogavo Do Lamine' O-ledamoloseinako Nemu' A'mingu' Vi Hilikelizave Lo Paulo' Lo-ngimine'

2 Ido' na'nise Paulo' nene ti' lo nolo-lingimuze. Gililo. Lingine gatine hizaa' nave nete lado' gili ngimi Mose' lou' gamazi'mi gesi mingu' vi hilalisa okodine lolovo huki hulilizani' nene lingine Kilisitoda vi gi'mizani' nene vo haza ogavo do lamine' o-lengedamoloseive. 3 Ido' okodine lolovo huki hulilizave muki' nene gohi do lamino lo-lengemeloze. Gililo. Zuda ve ne'mine lolo' okunivo nemu' O'moso'mo do lu' izelihe li lingine okodine lolovo huki hulilizani' ne'mo nene Mose' lou' gamazi ngomo' naba' vaito' nene gili di osu' lilizado' o mineleseive. 4 Ido' lingine O'moso'mo evene' lisihe' lamine' gehepeve ve lo-ledelive li Mose' lou' gamazilo' e'meti osu' lilisa ilizani' nene lingine Kilisito'ni nene mo huli-di mehedine imikeve. Ne'mine igisa O'moso'mi nasahili' nesi nene mo hulikeve.

5 Ido' ne'mine noluvoni' nene nemu' noluve: Laza Kilisitoda vo gi'mizunive nene okode lolovo huko hulo nolobe huko hulamo nolobe nemu' O'moso'mo leli' do lu' izelesa gala giline' nene do atoli'mine ma amoloseive. Ne'mine amoloseiha asi Kilisito'nimu' gele ele'vole' o none' ne'mo lute ngemaa' monovo nene ogo molo minelone' neevo' nene inite' gihile neive. Ne'mino neine' nenako nemu' O'moso'mo leli' nene ve lisihe' lamine' gehepeve ve lo-ledelive lo gelo laza ne'mine ilingumu' gizebo ogo none' nene O'moso'mi Sikalahu' ne'mo hize ele' o-ledavo Kilisito'nimu' gele ele'vole' ogo minuningumukovo' nene evene' lisihe' ve lo-ledeline' nenako nemu' nene luvoni' ve.

7 Gomu' nene lingine mono' akalo' lamini vivi' vivi' igi minani' maloti' idise nene mono' gamazi gihile malo' e'metami api' igi mehedine imilisa nani' nene zaho gatine hizo mono' akatine hize tilavosa ne'mine nave. 8 A'mine mono' akatine hize tilo gatine hizive nene lengi' vise lo-lengemo do eita ive ne'mo nene gatine hizavo ne'mine ma isa'mave. 9 Beleti do lulu izaa' ine' inite' zisiti nene ngomo lasolo ma do beleti lolo' olone' palauva' vaiku' nene nososi do gopo okunivo a'mine zisiti ne'mo palauvaku' mone oku' laa' neine' ne'mino evene' hamo hamo' ingine lengi' vovotingu' mini monovo goloso ma apizi lingimilizani' nene a'mine monovo nene lengita buu lo mone osu' lavo mukito' goloso ikelizave. 10 Ne neiha naza lengikumu' gelo ti' lo gele ele'vole' o nouve: Lingine Guvelesi vela vi gi'mizi nizani' nenako lingine nene neni' gele mino laa' nouvoni' mono' nene di ato' ami linginesi a'midokovo' gilaa' ilisave. Ne neiha lengi' lengele'mize gopo oga' neive nene zaho nolive. A'mine ve nene O'moso'mo lihime've emavo mulumo gono daloseive. 11 Ido' naza Kilisito'nimu' olihe gele ele'vole' amosa ma evene' muki' oko'ine lolovo huki hulilizani' ne'mo nene O'moso'mo do ngu' izeleseive lo gomu' laa' uvoni' ma nene idisesi ha lo-ngemaa' nooloseive li lingine gilaa' nahe. E'e, naza ne'mine lo apize ngemaa' uvodiniko Kilisito' leli' lihimetemu' lohoto' zalo' hilingumu' nene gele ele'vole' okunivo O'moso'mo do lu' izeleseive lo naza laa' nouvoni' nemu' goloso gilaa' nani' nene gohi gilamavo osu' lavo Mose' lou' gamazi'mi gesi mingu' vi hili nizave engi' nete neni' goboni mala' mala' i-nidaa' amadine. 12 Ne neiha O'moso'mo lengi' nene elese molo-lengedo do eita o-lingidine' nene lingine Mose' lou' gamazilo' gelekele' igi a'mine'mi goboni ve galapuso aleve ne'mini minami haza aleve minilizave losa elese molo-lengedo do eita o-lingidine' nenako nemu' nene ve ma ingine a'mine Mose' lou' gamazi'mi gesi mingu' nene vi minilizave li lengele'mizi gopo igi okodine lolovo huki huli-lingidilisa gilaa' nave ingine lengi' okodine lolovo nene huki hulilizado' nomine' nenako inite' ato' gohi ma huki hulilisa gili ma engi' inite'inesi vai' nene nanimu' huki hulamave.

Ee, neze zuho mate, O'moso'mo goboni ve minami haza aleve minilizave lo elese molo-lengedo do eita o-lengedani'za lingine laza nene lou' gamazi'mi goboni ve minamune' nenako olosa gilune' inite' muki' nene ha olosune li okodine'mo goloso initekumu' lanite' gelaa' neine' ne'mo lengele'mize gopo iline' aka've vilikelizave. Ne'mine ami evene' lute ngemaa' monovolo' gelekele' igi ge nasahili' o-nede ne nasahili' o-gede li minilo. 14 Ido' lute ngemaa' monovolo' gelekele' igi minilizave luvoni' nene monoku' gamazi hamo' ma neine' nene gele do osu' lolone' ne'mo nene O'moso'mi lou' gamazi vai' gele dune' geleleseinako nemu' luvoni' ve. A'mine gamazi nene ti' lo neive:

Gei' okongamu' gelaa' naine' ne'mino evene' ato ato' mamu' nesi gelo luka ngemezo.
15 Ne neine'za ne'mine ami lengi' okodingu' lovo lolize di soto' igi ge do leme-nede ne do leme-gede li minilizani' nene lingine vi tolovo ikelizaze. Ehe' igi ningisa minilo.

O'moso'mi Sikalahuli'mo Aka Lelebizidokovo' E'metelone' Nene Inite' Mali'mi Goboni Ve've Minamolosune Lo Paulo' Lo-ngimine'

16 Ido' nemu' naza ma ti' lo noluve: Lingine nene O'moso'mi Sikalahu' ne'mo lilido' lilidokovo' nene e'meti igi mili minilo. Ne'mine igi minilizani' ne'mo lengemeni dameni goloso gomu' igi mili monaa' ani' monovo ma nene gohi damilisave. 17 Ne'mine luvoni' nene nemu' noluve: Gomu' lengemeni dameni goloso ne'mo ato' initekumu' lanite' gilivo ido' O'moso'mi Sikalahu' ne'mo ato' initekumu' gilivo ne'mine igi eze ivile' olosa ivo ido' eze ivile' olosa ivo igi mini lutingu' lovo hizi minaa' nasine' ne'mo lingine ilisa gilani' inite' nene amilizado' oga' neive. 18 Ne neiha lingine O'moso'mi Sikalahu' ne'mo aka lengelebizido' e'metilizani' nene Mose' lou' gamazilo' gelekele' igi ne'mi goboni ve've minamilisave. 19 Ido' gomu' lemeni dameni goloso ne'mi monovo nene ha soto' ogo neine' nenako ne'mino neine' ma nene lingine mo gili ningani' ma neive: Vene' vemoho' alu gipe gopo' napa ongo'mo monaa' monovo ido' ne'mine monovo lute do goloso iline' monovo ato ato' ido' lovozo helamo a'mine monovo ato ato' nene evene' ve'nido' do soto' oga' 20 ido' soza o'mosolo' ngopo'ni laa' ido' poisini inite pata' do minaa' monovo nesi ido' evene' lovo o-ngemaa' ido' lolize lovo oga' ido' ngizebolo' molavo mulu'ningu' goloso gelaa' ido' ngizebolo' molaa' ido' guvetesi ve lolo' olone li engi' oko'inemu' gilavo dizavo amuzo milaa' ido' lu'ine di hamo' ami izi ho'li vi eza ema vaa' ido' ga'ine ato ato' gilii izi ho'li mulise ato ato' lili' iga' 21 ido' evene' maliti initeto' mumuzo' ogo lukehe lakehe oga' ido' noso no sipaki ogo minaa' ido' noso ni sipaki goloso igi minaa' pati do soto' oga' ido' nevo'mine inite pata' muki' nene gomu' lemeni dameni'mi monovo nenako nemu' mo gili nizani' ma neive. Gomu' lo-lingimuvoni' ma'mino idise gatine do ti' lo noluve: Evene' ma ingine me noluvoni' monovo danava ma di minilizave nene O'moso'mo gizebo o neingu' ma vi hilamilisaze. Ehe' igi ningisa minilo.

22 Ne neiha O'moso'mi Sikalahu' ne'mo luteu' gono do neivo ne'mi gihile nene ne'mine monovo ogo molo minelesune: Lute ngemo nasahili' o-ngedaa' ido' muludeu' lamine' gelaa' ido' gopo gate gelamo lamino minaa' ido' lizebolo' molani' inite' ikevo ma goloso gelamo zou lo minaa' ido' mangi gatulo ogo minaa' ido' inite' ogo molo olo ma nene evene' go'ine izamo monovote lisihetotikovo' ogo molo oga' 23 ido' lemo zou lo minaa' ido' gomu' lemeni dameni goloso nene gohi ogalone lo ningosa minelone. A'mine ne'mine monovo lamine' nene ogo molo ogakumu' lou' gamazi ma ne'mine amaa' ve lo minine' ma nomive. 24 Ido' Kilisito' evenele zuho laza gomu' lemeni dameni golososi ido' a'mine'mo goloso initekumu' umo helo lanite' gelaa' ine' monovo'vesi nene mo lohoto' zalo' bele hilune' gelavo a'mine monovo danava goloso nene ogo molo amo minaa' noune. 25 O'moso'mi Sikalahu' ne'mo lemeni dameni gosoho' do soto' o-ledavo minevo dovo' ogo nounako nemu' nene a'mine Sikalahuli'mo aka lelebizidokovo' nene e'meto vo minelone.

26 Laza leli' okode do dize dize' ogo ne givile' o-gede ge nivile' o-nede lo mino ge mulu'neu' hizo do goloso o-nede ne mulungau' hizo do goloso o-gede lamo lamino mino a'minguti' ma livile' igi minilizangumu' nene lukehe ngebelamo minelesune.